Irakurlea: Pako Eizagirre
MUSIKAREN LURRALDEAK VIII
Kantaidazue orain bolero bat
eguerdi osteko ordu beroenetan,
bigun-bigunak gorputz-gogoak, izerditan.
Amodioa bularraren gainean datzan nagitasuna
besterik ez denean.
Kantaidazue orain bolero bat
egiarekin fermuki uztarturik
eguzkiak odola jabaltzen duen bitartean.
Berdin zait
itxaropen, promes, zoramen, kexa,
despit, adio, gorroto edo jelosia.
Kantaidazue orain bolero bat
planetak itsasoan zabuka
zeruak indar kiskalgarria galdu aurretik.
Amodioa
bularraren gainean datzan nagitasuna
besterik ez denean.
Rikardo Arregi Diaz de Heredia